Assalamu Alaykom Warahmatullahi Wabarakatuh:

Phanalamatan akn so langon a BALOINIANS mlagid so kiyapantagan sa Ingd ko alongan a Isnin agoso sii sa liyo kiyapantagi. Phanalamatan akn pn so mga KANDIDATO tano sabap ko kiyapagatiran ko kokoman o mga pipiya a tao ko kinitandaaniran ko pinili iran a mga nakoda tano.

Phanalamatan akn mambo so mga BLOGGERS sangkae a darpa tano sa kawang sabap ko kasanggila ago kaongo iran. Panamaran tano a so giitano dii kam BLOG BLOG na di kasabapan sa kapakam BLABLAG tano. Pakalaan tano so kazabar ago so kanapi aya mala na so kasanggila ka adn makabagr so solayan o kaiisaisa tano ko Ingd nago sii ko bangsa.

Katii so kabasa o sabaad ko mga oongang sa Ranao: TINIMBANG KON SO BOLAWAN AGO SO PIRAK NA MAPND SO BOLAWAN. TINIMBANG PMAN SO BOLAWAN AGO SO MONTIYA NA MAPND SO MONTIYA. TINIMBANG PMAN SO MONTIYA AGO SO DII KANGGIGINAWAE NA MAPND SO DII KANGGIGINAWAE.

Sii ko kinibago o kapag ELECTION sa Ingd a Ranao ko kapamili sa nakoda na Inosar o sabaad a Kandidato so TIMBANGAN. Na sabap ko kapnd o dii kanggiginawae na tanto a mapiya a kabibiday o ditano dii kapamili sa nakoda sabap sa AYA MALA E ARGA AGO TANTO A MAPND na so dii kanggiginawae.

So pman so kinibago o kapamamasa sa BOTO o kadaklan ko maki phangongoripn na katii so miyasowa: TINIMBANG SO DII KANGGIGINAWAE AGO SO KAPAMAMASA SA BOTO NA AYADN KIYASABAPAN A INIKAGBA O TIMBANGAN SA TAMAN DN IMANTO NA DA KAOMPIYAE. Aya kon a isa a sabap a kiyabinasa o Timbangan na kagiya MAPND SO TINIMBANG ADI SO TINIMBANGANON. Maana miyada ko OSOLIYAN a tig o mga Tableg sabap sa aya patot na "MAPND SO TIMBANGAN ADI SO TITIMBANGNON".

Mga pagariyakn mga bayayakn a mga Baloinians a khipagaadatan, mamagogopa tano sa kitarg o kanggasto sa mala igira a election sabap sa mataan a apiya so pphakataban na DII MAKAMBAOMAN sabap ko kala a gasto.

Ompiyaan tano so TIMBANGAN a itatadi o mga lokstano ka adn mikasoy so kalae arga o dii tano KAPAMAGADATA aya mala na so dii tano KANGGIGINAWAE.

Wassalamu Ayakum.